Archives for News & Events

Majaliwa atoa miezi mitatu kwa wakuu wa mikoa kukamilisha masoko ya madini

Nuru Mwasampeta na Greyson Mwase, Geita

Waziri Mkuu wa Jamhuri ya Muungano wa Tanzania, Kassim Majaliwa ametoa muda wa miezi mitatu kwa wakuu wa mikoa hususan mikoa yenye utajiri mwingi wa madini ya metali na vito nchini kuhakikisha wanakamilisha na kufungua masoko ya madini ili kuwawezesha wachimbaji na wafanyabiashara ya madini kuwa na soko la uhakika la madini hayo.

Majaliwa alitoa agizo hilo kwenye uzinduzi wa Soko la Madini la Geita tarehe 17 Machi, 2019 uliofanyika katika viwanja vya Soko Kuu mkoani Geita na kuhudhuriwa na viongozi wengine wa kiserikali ikiwa ni pamoja na Waziri wa Madini, Doto Biteko, Katibu Mkuu wa Wizara ya Madini, Profesa Simon Msanjila, Mwenyekiti wa Tume ya Madini, Profesa Idris Kikula na Katibu Mtendaji wa Tume ya Madini, Profesa Shukrani Manya.

Waziri wa Madini, Doto Biteko akifafanua jambo kwenye uzinduzi huo.

Wengine ni pamoja na Mwenyekiti wa Kamati ya Kudumu ya Bunge ya Nishati na Madini, Dustan Kitandula, watendaji kutoka Tume ya Madini, Wakuu wa Mikoa, wabunge, madiwani, viongozi wa dini, waandishi wa habari pamoja na wananchi kutoka katika mkoa wa Geita pamoja na mikoa ya  jirani.

Alisema kuwa, uanzishwaji wa masoko ya madini ni  sehemu ya utekelezaji wa maagizo ya Rais wa Jamhuri ya Muungano wa Tanzania, Dkt. John Magufuli aliyoyatoa tarehe 22 Januari, 2019 kwenye mkutano wake na wachimbaji wa madini nchini uliofanyika jijini Dar Es Salaam.

“Ninawataka wakuu wa mikoa kuhakikisha agizo hili linatekelezwa kabla ya mwaka wa fedha kumalizika Juni 30, 2019,” alisema Majaliwa.

Alisema kuwa, katika kuhakikisha Sekta ya Madini inakuwa na mchango mkubwa kwenye ukuaji wa uchumi wa nchi na kuwanufaisha watanzania wote, Serikali kupitia Wizara ya Madini ilianza kwa kuboresha Sheria ya Madini pamoja na kanuni zake na kuwataka wananchi kuchangamkia fursa hiyo.

Aliongeza kuwa, serikali imeamua kuondoa tozo mbalimbali zilizokuwa mzigo kwa wachimbaji wa madini uli uchimbaji wao uwe na faida kubwa na kuwawezesha kulipa kodi mbalimbali za Serikali.

Alisema kuwa, kufutwa kwa kodi na tozo mbalimbali kutapunguza kwa kiwango kikubwa utoroshwaji wa madini nje ya nchi na Serikali kujipatia pato kubwa linalotokana na shughuli za madini nchini.

Soko la Madini Geita kabla ya uzinduzi wake tarehe 17 Machi, 2019.

Akielezea umuhimu wa masoko ya madini, Majaliwa alieleza kuwa mbali na kupunguza utoroshwaji wa madini, hakutakuwepo na dhuluma kwa wachimbaji wadogo wa madini kwani watakuwa na sehemu yenye uhakika ya kuuzia madini hayo kulingana na bei elekezi iliyotolewa na Serikali.

Aliendelea kueleza kuwa, soko la madini litarahisisha huduma za uuzaji na ununuzi wa madini ambapo huduma zote zitatolewa ndani ya jengo moja hivyo kuokoa muda wa wauzaji na wanunuzi wa madini.

Katika hatua nyingine, Majaliwa alitoa tahadhari kwa wadau wote wa madini kuwa, atakayekamatwa anatorosha madini atachukuliwa hatua za kisheria ikiwemo utaifishaji wa madini atakayokuwa akiyatorosha.

Pia aliwataka viongozi na watendaji wa Serikali kusimamia kwa weledi, uaminifu na uadilifu, sheria, kanuni na miongozo mbalimbali kuhusu sekta ya madini kwa lengo la kudhibiti utoroshwaji wa madini hususan dhahabu kwenda nje ya nchi.

Aidha, aliitaka Wizara ya Madini, Tume ya Madini, Serikali ya Mkoa, Idara na Taasisi nyingine za Serikali zinazohusika na maendeleo ya sekta ya madini kuheshimu mipaka ya majukumu yao ili waweze kulisimamia vizuri soko hilo na kufanya kazi kama ilivyokusudiwa.

Waziri Mkuu wa Jamhuri ya Muungano wa Tanzania, Kassim Majaliwa (katikati) akisalimiana na Mwenyekiti wa Tume ya Madini, Profesa Idris Kikula kabla ya kuzindua Soko la Madini Geita tarehe 17 Machi, 2019.

“Wizara ya Madini, ishirikiane na vyama na mashirikisho ya wachimbaji na wafanyabiashara wa madini kuandaa mpango kazi mahususi kwa ajili ya utekelezaji wa majukumu ya soko hilo ili lisigeuke kuwa kikwazo kipya kwa wachimbaji na wafanyabiashara wa madini,” alisisitiza Majaliwa.

Aliendelea kusisitiza kuwa, Serikali imeamua kutoa mwelekeo mpya katika usimamizi na maendeleo ya sekta ya madini ambapo utekelezaji wa dhamira hiyo unakwenda sambamba na kuweka mazingira mazuri na miundombinu itakayowezesha kuimarika kwa sekta ya madini nchini.

Read more

Mkurugenzi wa Ukaguzi wa Migodi na Mazingira, Tume ya Madini Aongoza Ziara ya Kamati ya Kitaifa ya Ufungaji Migodi Katika Mgodi wa Dhahabu wa Geita

Mkurugenzi wa Ukaguzi wa Migodi na Mazingira  kutoka Tume ya Madini, ambaye pia ni Mwenyekiti wa Kamati ya Kitaifa ya Ufungaji wa Migodi, Dkt. Abdulrahaman Mwanga tarehe 27 Februari, 2019  ameongoza wajumbe wa kamati hiyo katika ziara kwenye Mgodi wa Dhahabu wa Geita (GGM) uliopo Wilayani Geita mkoani Geita. Ziara hiyo ni sehemu ya kikao chake kilichofanyika mgodini hapo kwa ajili ya kujadili Mpango wa Ufungaji wa Mgodi wa Dhahabu wa Geita (GGM).

Washiriki wa Kamati hiyo  walikuwa ni kutoka katika Ofisi ya Mkuu wa Mkoa wa Geita, Mkuu wa Wilaya ya Geita, Josephat Maganga, Wizara ya Madini, Tume ya Madini, Wizara ya Ardhi, Nyumba na Maendeleo ya Makazi na Wizara ya Maliasili na Utalii.

Wengine ni kutoka katika Wizara ya Maji, Baraza la Taifa la Uhifadhi na Usimamizi wa Mazingira (NEMC) na Ofisi ya Makamu wa Rais- Mazingira na Muungano.

Akizungumzia kikao hicho kilichoanza tangu siku ya Jumatatu, Dkt. Mwanga alieleza kuwa lengo la kikao lilikuwa ni kujadili Mpango wa Ufungaji wa Mgodi wa Dhahabu wa Geita (GGM) na kusisitiza kuwa iwapo watauridhia wataupitisha kwa ajili ya utekelezaji wake.

Aliendelea kusema kuwa Mgodi wa Dhahabu wa Geita (GGM) umeandaa mpango huo ambapo ufungaji wa mgodi  unaweza kufanyika kuanzia miaka 10 ijayo au hata zaidi kutokana na utafiti wa madini mengine unaoendelea.

“Hapa ieleweke kuwa mgodi unaweza kuendelea na shughuli zake hata baada ya miaka 10 iwapo kutagundulika madini mengine na kuendelea kuchimba kama kawaida,” alisema Dkt. Mwanga.

Alisisitiza kuwa, Mpango wa Ufungaji wa Mgodi wa Madini ni muhimu kwa mgodi wa aina yoyote nchini na kusisitiza kuwa unatakiwa  kundaliwa mwanzoni mwa shughuli za madini zinapoanza.

Akielezea umuhimu wa kuwepo kwa Mpango wa Ufungaji wa Mgodi, Dkt. Mwanga alisema kuwa, unasaidia mgodi kujiandaa katika udhibiti wa uharibifu wa mazingira unaoweza kujitokeza wakati wa shughuli za uchimbaji wa madini na pamoja na kuwasaidia wananchi kuwa na uchumi endelevu mara baada ya kukamilika kwa shughuli za uchimbaji wa madini.

“Kama Serikali tunapenda kuhakikisha shughuli za kiuchumi za wananchi wanaoishi karibu na migodi inayotarajiwa kufungwa haziathiriki na ufungaji wa migodi husika,” alisisitiza Dkt. Mwanga.

Katika hatua nyingine katika ziara hiyo Dkt. Mwanga alishauri mgodi huo kuhakikisha mali zenye thamani ambazo zinafaa kwa matumizi mengine mara baada ya ufungaji wa mgodi zinaendelea kutumika ili kunufaisha jamii inayozunguka mgodi hususan katika ajira hivyo kujiingizia kipato. Aidha aliutaka mgodi kuendelea kujiandaa kwa kusawazisha maeneo yenye mashimo pamoja na kupanda miti yenye thamani

Read more

Prof. Msanjila ashikilia Msimamo wa Serikali Kuhusu Mgodi wa North Mara

Na Issa Mtuwa, Dodoma

Serikali kupitia Wizara ya Madini imesema bado imeshikilia msimamo wake kuhusu muda uliotolewa kwa Mgodi wa North Mara kutekeleza maagizo ya serikali yaliyotolewa kwenye kikao cha Januari 9, 2019 kuhusu Bwawa la kuhifadhi topesumu (Tailings Storage Facility -TSF).

Hayo yamesemwa na Katibu Mkuu wa Wizara ya Madini, Profesa Simon Msanjila Februari 26, 2019 wakati akizungumza katika mahojiano maalum ofisini kwake Jijini Dodoma, mara baada ya kufungua kikao cha pamoja baina ya wajumbe kutoka serikalini na wajumbe kutoka Mgodi wa North Mara waliokutana kujadili kuhusu hatua zilizofikwa na Mgodi katika kutekeleza maagizo hayo.

Amesema serikali haitoongeza muda zaidi ya ule uliotolewa katika kikao cha awali, na kusema kuwa msimamo wa serikali utabaki kuwa hivyo.

 “Ndugu zangu katika kikao hiki kilenge kutoa majibu ya utekelezaji wa maagizo ya serikali kama yalivyowasilishwa kwenye kikao cha Januari 9, 2019, ni kwa kiasi gani mmetekeleza maagizo hayo,” alisema Prof. Msanjila.

Serikali kupitia kikao chake cha Januari 9, 2019 chini ya Makatibu Wakuu wa wizara saba (Madini, Makamu wa Rais Mazingira (NEMC), Ardhi, TAMISEMI, Afya, Fedha na Maji) kilitoa maagizo mbalimbali yakiwemo: Kujenga TFS mpya na Kukarabati TFS iliyopo kwa aajili ya kudhibiti mtiririko wa topesumu, maagizo ambayo mgodi ulipewa kuyatekeleza kwa muda wa miezi Nane (8) kuanzia Januari 9, 2019.

Akiongoza wakati wa mjadala wa uwasilishaji wa mada mbalimbali wa kikao hicho, chini ya Mwenyekiti wa kikao hicho Prof. Hudson Nkotaga aliwataka North Mara kueleza namna gani wametekeleza maagizo ya serikali kwa lengo la kupata mrejesho wa utekelezaji.

Kuhusu utekelezaji wa maagizo hayo, Meneja Usalama, Afya na Mazingira Reuben Ngusaru, kutoka mgodi wa North Mara amesema mgodi umeanza kutekeleza maagizo hayo na bado wanaendelea kutekeleza maagizo hayo na hata kikao cha tarehe 26 Februari ikiwa ni moja mkakati wa kutekeleza maagizo hayo kwa ufanisi.

Akizungumzia kuhusu hatua zilizochukuliwa na mgodi kudhibiti uvujaji unaoendelea kwenye (TSF)mpaka kufikia siku ya kikao cha Februari 26, mambo yaliyotekelezwa ni pamoja na: Kuondoa mawe na kusafisha mtaro uliopo upande wa Kaskazini mwa TSF.Kuvukiza (evaporation) maji yaliyotokana na uchenjuaji wa mawe yanayotengeneza tindikali asili (PAF Rock) (leachate water) badala ya kuyapeleka yote kwenye TSF na Programu zote zilizokuwepo za kupunguza maji katika TSF bado zinaendelea.

Aidha, kuhusu utekelezaji uliofikiwa katika kutekeleza agizo la Serikali la kujenga TSF mpya (Construction of a new TSF) Reuben amesema mpaka kufika tarehe 26 Februari, mgodi umefanya utambuzi wa eneo linalofaa kwa ajili ya ujenzi wa TSF mpya (Site Identification) nau sanifu wa awali (Conceptual design) ambapo usanifu wa awali umefanyika na ujenzi wa TSF mpya unatarajiwa kuwa na uwezo wa kuhifadhi tani milioni 45 za tope sumu (tailings) kavu kwa kadirio la ongezeko la tani 8200 kwa siku.

Maagizo ya serikali kwa mgodi wa North Mara yalitokana na ukaguzi uliofanywa na serikali kwenye mgodi huo uliohusisha timu kutoka ofisi mbalimbali za serikali zikiwemo, NEMC, Mkemia Mkuu wa Serikali, Wizara ya Madini, na Wizara ya Afya, uliopelekea kutolewa kwa maagizo yaliyolenga kudhibiti uharibifu wa mazingira uliokuwa unafanywa na mgodi.

Read more

Leseni za Migodi Mikubwa Kutolewa Karibuni

Na Asteria Muhozya, Dodoma

Serikali kupitia Wizara ya Madini inakamilisha taratibu za utoaji wa Leseni kwa Migodi Mikubwa ambazo hazijawahi kutolewa nchini, huku migodi hiyo ikitarajiwa kuanzishwa hivi karibuni.

Hayo yamebainishwa na Katibu Mkuu wa Wizara ya Madini Prof. Simon Msanjila alipokutana na viongozi wa Jumuiya ya Watendaji Wakuu wa Taasisi Binafsi ofisini kwake, jijini Dodoma.

Viongozi hao walikutana na Prof. Msanjila Februari 26, kwa lengo la kujitambulisha, kuelewa shughuli za serikali upande wa sekta ya madini, kupata uelewa kuhusu mabadiliko ya Sheria ya Madini na namna pande hizo mbili zinavyoweza kushirikiana katika kuendeleza sekta husika.

Prof. Msanjila aliwakaribisha viongozi hao kwenye sekta ya madini huku akiwataka kuzishawishi kampuni mbalimbali kuwekeza nchini hususani katika shughuli za uongezaji thamani madini na kueleza kuwa, suala hilo ni miongoni mwa maeneo ambayo serikali inayapa kipaumbele ikiwemo ujenzi wa vinu vya kusafisha na kuyeyusha madini.

Akizungumzia Sheria Mpya ya Madini ya Mwaka 2017, Prof. Msanjila amesema hakuna tatizo lolote katika utekelezaji wa sheria na kueleza kuwa, serikali kupitia wizara ya madini inapokea wawekezaji wengi wenye utayari na nia ya kuwekeza nchini huku utekelezaji wa sheria hiyo ukiwa si kikwazo na kuongeza kwamba, “hakuna mahali ambapo serikali inatengeneza sheria kwa ajili ya kumkandamiza mfanya biashara”.

“Hakuna tatizo lolote kwenye sheria ya madini. Hata wageni huwa tunakaa nao tunawaelimisha na wanatuelewa vizuri.  Kama kuna dosari ni vitu ambavyo tunaweza kuvirekebisha na tayari tumekwishakufanya hivyo kwa baadhi ya maeneo,” alisema Prof. Msanjila.

Aidha, katika kikao hicho Prof. Msanjila alitoa ushauri kwa viongozi hao kujitangaza zaidi kuhusu kazi zao huku akiwataka kutafuta wasaa kwa ajili ya pande hizo mbili kukutana ili wizara iweze kutoa elimu zaidi kwa Jumuiya hiyo kuhusu sekta ya madini ikiwemo fursa za uwekezaji zilizopo.

Pia, Prof. Msanjila alisema kuwa suala la kuaminiana linaweza kujengwa huku akiwataka watanzania kuwa wazalendo na namna wanavyotumia fedha za umma. Prof. Msanjila alizungumzia jambo hilo baada ya mmoja wa viongozi hao kueleza kuwa, bado kuna hali ya kutokuaminiana baina ya serikali na taasisi binafsi. Kwa upande wake, mmoja wa viongozi wa jumuiya hiyo, Francis Nanai ambaye pia ni Mkurugenzi Mtendaji wa Kampuni ya Mwananchi Communications Limited amemweleza Prof. Msanjila kuwa, kama viongozi wa umoja huo, wamezipokea changamoto zilizotolewa kwao na Prof. Msanjila ikiwemo ushauri wa kukutana na wizara kwa lengo la kupata ufafanuzi na elimu  zaidi  kuhusu sekta ya madini.

Read more

Dkt Macheyeki Aitaka Kampuni Ya Neelkanth Kuachana Na Uagizaji Wa Malighafi Kutoka Nje Ya Nchi

Na Greyson Mwase, Pwani.

Kamishna wa Tume ya Madini, Dkt. Athanas Macheyeki ameitaka kampuni inayojishughulisha na uzalishaji wa chumvi ya Neelkanth Salt Limited iliyopo Wilayani Mkuranga mkoani Pwani kuachana na uagizaji wa malighafi zinazotumika katika kuzalisha chumvi  kutoka nje ya nchi na badala yake ijikite kwenye matumizi ya malighafi zilizopo nchini na kusisitiza kuwa kufanya hivyo kunazorotesha soko la ndani.

Dkt. Macheyeki alitoa agizo hilo mapema leo tarehe 22 Februari, 2019 kwenye ziara yake katika kiwanda hicho ikiwa ni sehemu ya ziara ya Mwenyekiti wa Tume ya Madini, Profesa Idris Kikula katika mkoa wa Pwani yenye lengo la kutembelea wachimbaji wa madini pamoja na kusikiliza na kutatua kero mbalimbali zinazowakabili.

Aliyasema hayo mara baada ya kuelezwa kuwa kampuni hiyo imekuwa ikiagiza  malighafi ya chumvi kwa asilimia kati ya 60 na 70 kutoka katika nchi za Namibia, India na Afrika ya Kusini.

Alisema kuwa Sheria ya Madini ya Mwaka 2010 pamoja na Marekebisho yake ya Mwaka 2017 inawataka wachimbaji wa madini nchini kutumia bidhaa za ndani ya nchi badala ya kuagiza kutoka nje ya nchi na kuitaka kampuni hiyo kuendelea kujipanga zaidi katika kuhakikisha baadaye inaondokana na matumizi ya malighafi za kutoka nje ya nchi.

Aliendelea kusema kuwa, katika kujiandaa na matumizi ya malighafi ya chumvi kutoka ndani ya nchi, kampuni inatakiwa kutoa elimu kwa wazalishaji wa chumvi katika mikoa ya Lindi, Mtwara na Kilwa ili waweze kununua chumvi iliyo bora na kuondokana na matumizi ya malighafi ya chumvi kutoka nje ya nchi na kuinua uchumi wa wazalishaji hao wa chumvi.

Katika hatua nyingine, Dkt. Macheyeki aliitaka kampuni hiyo kuhakikisha inawasilisha mpango wa manunuzi ya bidhaa na huduma kutoka wananchi wanaoishi karibu na kiwanda hicho (local content plan) pamoja na kiapo cha uadilifu   Machi 15 mwaka huu  kwenye Ofisi za Mtendaji Mkuu wa Tume ya Madini zilizopo jijini Dodoma.

Aidha, Dkt. Macheyeki aliitaka kampuni hiyo kuwasilisha mpango wa kuongeza ujuzi kwa wafanyakazi wake ili baadaye waweze kushika nafasi za wataalam kutoka nje ya nchi kwenye Ofisi za Tume ya Madini mapema kama Sheria ya Madini inavyowataka.

Aliendelea kufafanua kuwa, Serikali inapenda kuona wawekezaji katika sekta ya madini wanafanya kazi katika mazingira mazuri ili waweze kulipa kodi mbalimbali Serikalini.

“Ndio maana tozo nyingi zilizokuwepo kwenye madini ya chumvi zimeondolewa, tunataka mzalishe kwa faida, lakini wito wangu kwenu ni kuhakikisha mnafuata Sheria ya Madini pamoja na kanuni zake, Tume ya Madini ipo tayari kuwasaidia muda wowote,” alisisitiza Dkt. Macheyeki.

Awali akizungumzia changamoto za kampuni hiyo, mmoja wa wataalam kutoka kampuni hiyo, Tanmay Purohit alisema kuwa kumekuwepo na changamoto ya kukatika kwa umeme na kuongeza kuwa wameshaiomba Serikali kupitia Wakala wa Nishati Vijijini (REA) kuwekewa umeme katika mashamba ya chumvi yaliyopo katika eneo la Shungubweni wilayani humo na kuwekewa gesi kwa ajili ya matumizi ya kiwandani hapo.

Alisema kuwa wamekuwa wakitumia gharama kubwa ya kuendesha mitambo kwa kutumia dizeli pindi umeme unapokatika kiwandani hapo na katika mashamba ya chumvi.

Read more

Wachimbaji Madini Watakiwa Kuwa Na Mpango Wa Ufungaji Mgodi

Na Greyson Mwase, Pwani

Mwenyekiti wa Tume ya Madini, Profesa Idris Kikula amewataka wachimbaji wa madini  ya ujenzi  aina ya kokoto katika mkoa wa Pwani kuwa na Mpango wa Ufungaji Mgodi utakaotumika kama mwongozo wa kuhakikisha mazingira yanaachwa yakiwa katika hali salama mara baada ya kumalizika kwa shughuli za uchimbaji wa madini hayo.

Profesa Kikula aliyasema hayo tarehe 21 Februari, 2019 katika nyakati tofauti alipofanya ziara yake katika migodi  inayojishughulisha na shughuli za uchimbaji wa madini ujenzi aina ya kokoto iliyopo katika Wilaya ya Bagamoyo mkoani Pwani yenye lengo la kutembelea wachimbaji wa madini hayo pamoja na kusikiliza na kutatua kero mbalimbali zinazowakabili.

Profesa Kikula katika ziara hiyo akiwa ameambatana na Kamishna – Tume ya Madini, Dkt. Athanas Macheyeki, wataalam kutoka Makao Makuu ya Tume ya Madini jijini Dodoma, Ofisi ya Afisa Madini Mkazi wa Mkoa wa Dar es Salaam, Ofisi ya Afisa Migodi Mkazi wa Lugoba pamoja na waandishi wa habari, Profesa Kikula alitembelea migodi ya Sisti Mganga, Gulf Concrete Company Limited na  Yaate Company Limited iliyopo katika Wilaya ya Bagamoyo.

Akizungumza katika nyakati tofauti mara baada ya kutembelea migodi hiyo, Profesa Kikula aliwataka wamiliki wa migodi kuhakikisha wanakuwa na mipango ya ufungaji migodi mapema badala ya kusubiri mpaka shughuli za uchimbaji madini zinapomalizika hivyo kufanya zoezi la ufungaji wa migodi kuwa gumu huku wakiacha mazingira yakiwa hatarishi.

“Ninapenda kuwakumbusha kuwa suala la kuwa na Mpango wa Ufungaji wa Migodi ni la lazima kulingana na Sheria ya Madini pamoja na kanuni zake, hivyo ninawataka kuhakikisha mnakuwa na mpango ili kuhakikisha mashimo hayaachwi wazi,” alisema Profesa Kikula.

Awali akiwa katika mgodi unaomilikiwa na Sisti Mganga Profesa Kikula  alielezwa mafanikio ya mgodi huo ikiwa ni pamoja na  kokoto za mgodi huo kutumika katika ujenzi wa daraja la Mto Wami uliopo mkoani Pwani,  reli ya kisasa ya standard gauge na utengenezaji wa marumaru kwa ajili ya soko la ndani ya nchi.

Katika hatua nyingine Mganga alitaja changamoto zinazoukumba mgodi huo kuwa ni pamoja na tozo kubwa kutoka katika halmashauri na tozo nyingine zinazotozwa na kijiji cha Kihangaiko  pasipo kuwa na risiti pamoja na ukosefu wa vifaa vya kisasa.

Mmoja wa watendaji wa mgodi wa kuzalisha kokoto wa Gulf Concrete Company Limited, ulipo katika Wilaya ya Bagamoyo Mkoani Pwani, Ramesh Annlahamadu (kushoto) akifafanua jambo kwa Mwenyekiti wa Tume ya Madini, Profesa Idris Kikula (katikati) mara alipofanya ziara kwenye mgodi huo ikiwa ni sehemu ya ziara yake katika mkoa huo yenye lengo la kukagua shughuli za uchimbaji wa madini ya kokoto, kusikiliza na kutatua kero za wachimbaji tarehe 21 Februari, 2019. Kulia mbele ni Kamishna – Tume ya Madini, Dkt. Athanas Macheyeki.

Profesa Kikula alisema kuwa, suala la tozo litafanyiwa kazi kwa kuliwasilisha mamlaka za juu kwa ajili ya kufanyiwa kazi na kusisitiza kuwa nia ya Serikali kupitia Tume ya Madini, ni kuhakikisha wachimbaji wa madini hususan wadogo wanafanya kazi katika mazingira mazuri yenye faida kubwa huku wakilipa kodi mbalimbali Serikalini pasipo vikwazo vyovyote.

Wakati huo huo, akiwa katika mgodi wa uzalishaji wa kokoto wa Gulf  Concrete Limited Profesa Kikula alitoa mwezi mmoja kwa uongozi wa mgodi huo kuhakikisha wanarekebisha kasoro ya mazingira kwa kuhakikisha vumbi linalotoka wakati wa shughuli za uchimbaji wa kokoto halisambai kwani linaathiri wananchi  wa vijiji vya jirani katika mgodi huo.

Alisema ni vyema wakazingatia Sheria ya Mazingira kwani vumbi mbali na kuathiri wananchi wanaoishi katika vijiji vya jirani linaweza kuathiri wafanyakazi wa mgodi huo.

Aidha, alituaka mgodi huo kuendelea kuhakikisha unatoa huduma kwa jamii inayozunguka mgodi huo na kutumia huduma za ndani ya nchi kama vile bidhaa pamoja na ajira kwa wazawa.

Katika hatua nyingine, Profesa Kikula akiwa katika mgodi wa kuzalisha kokoto wa Yaate Co. Limited, mbali na kuupongeza mgodi kwa kuaminiwa na kupewa kazi ya kusambaza kokoto kwenye mradi wa ujenzi wa reli ya kisasa ya standard gauge unaotelekezwa na kampuni ya Yapi  Merkezi na kutoa huduma mbalimbali kwa jamii inayouzunguka mgodi huo pamoja na ajira, aliutaka mgodi huo kuendelea kununua bidhaa/huduma kutoka kwa wananchi.

“Kutoa huduma bora kwa wananchi wanaozunguka mgodi kunaboresha mahusiano na kupunguza migogoro ya mara kwa mara inayoweza kujitokeza.

Awali akielezea mafanikio ya mgodi, Mkurugenzi Mtendaji wa Yaate Co. Limited, Eugen Mikongoti alisema  mradi umenufaisha watanzania wengi kwa kuchangia maendeleo ikiwa ni pamoja na ulipaji  wa zaidi ya shilingi bilioni 1.31 ambazo zimelipwa kama ushuru wa madini  kati ya kipindi cha mwezi Juni, 2018 hadi Januari, 2019 na shilingi milioni 338.8 zilizolipwa kama mrabaha.

Alieleza mafanikio mengine kuwa ni pamoja na utoaji wa fursa za ajira kwa watanzania hususan vijana wanaozunguka mgodi na kuziwezesha kampuni zinazomilikiwa na wazawa kushiriki katika miradi mikubwa  hivyo kuzijengea uwezo wa kitaalam na kupata fursa.

Mikongoti alitaja mafanikio mengine kuwa ni pamoja na kuwezesha maendeleo ya wanachi wanoishi karibu na mgodi kupitia huduma za jamii ambapo mpaka  sasa mgodi huo  unaendelea na ujenzi wa nyumba za watumishi na kuhudumia wananchi katika zahanati iliyopo mgodini. Katika hatua nyingine Mikongoti alipongeza kazi kubwa zinazofanywa na Tume ya Madini chini ya Mwenyekiti wake Profesa Kikula ikiwa ni pamoja na kuwatembelea, kuwapa elimu na kutatua changamoto mbalimbali.

Read more

Waziri Biteko Aiagiza Tume Ya Madini Kuziandikia Hati Ya Makosa Leseni Za Madini 18, 341

  • Leseni Hai Za Utafiti Wa Madini Ambazo Hazifanyi Kazi Kufutwa

Greyson Mwase, Asteria Muhozya na Nuru Mwasapeta

Waziri wa Madini, Doto Biteko ameiagiza Tume ya Madini  kuziandikia hati za makosa leseni za madini 18, 341 zinazodaiwa ili zilipe madeni hayo ndani ya siku 30 na wakishindwa kulipa madeni hayo ndani ya muda huo, leseni hizo zifutwe ndani ya siku saba baada ya mwisho wa hati za makosa.

Waziri Biteko ametoa agizo hilo jijini Dodoma leo tarehe 18 Februari, 2019 kupitia mkutano wake na waandishi wa habari ambao umewashirikisha Katibu Mkuu wa Wizara ya Madini, Profesa Simon Msanjila, Mwenyekiti wa Tume ya Madini, Profesa Idris Kikula, Kamishna kutoka Tume ya Madini, Dkt. Athanas Macheyeki pamoja na watendaji kutoka Wizara ya Madini na Tume ya Madini.

Amesema kuwa zoezi husika lifanywe kwa mujibu wa kifungu cha 63 cha Sheria ya Madini ya Mwaka 2010 na marekebisho yake ya mwaka 2017 na kusisitiza lisiangalie nani anamiliki leseni hiyo hata kama ni taasisi ya Serikali.

“ Hata ile leseni ya Liganga na Mchuchuma ambayo inamilikiwa na Shirika la Maendeleo la Taifa (NDC) na mbia wake najua inadaiwa ada ya Dola za Marekani zaidi ya 375,000, sheria ifuate mkondo wake,” alisema Biteko

Katika hatua nyingine, Waziri Biteko aliiagiza Tume ya Madini kufuta leseni zote za utafiti ambazo zipo hai na hazina madeni, lakini toka zitolewe imepita miezi mitatu bila kuanza kuandaa na kukusanya vifaa stahiki  kwa ajili ya utafiti au imepita zaidi ya miezi zaidi ya sita bila kuanza kufanya utafiti kwani ni kinyume na  kifungu cha 36(1) cha Sheria ya Madini ya Mwaka 2010 na Marekebisho yake ya Mwaka 2017.

Waziri wa Madini, Doto Biteko akiwakaribisha waandishi kutoka vyombo mbalimbali vya habari katika mkutano huo.

Aidha aliiagiza Tume ya Madini kuhakikisha kuwa maeneo yote yaliyoainishwa na kutangazwa na Serikali  kwa ajili ya wachimbaji wadogo yatolewe leseni za uchimbaji mdogo tu kwa mujibu wa kifungu cha 16 cha Sheria ya Madini ya Mwaka 2010 na Marekebisho yake ya Mwaka 2017 na yasitolewe kwa uchimbaji wa kati wala mkubwa ili kuwaendeleza na kuwaimarisha kiuchumi wachimbaji wadogo

Alisema kuwa, kuna baadhi ya maeneo ambayo yalitengwa kwa ajili ya wachimbaji wadogo likiwemo eneo la Melela lilipo mkoni Morogoro ambapo yalitolewa leseni bila kufuata taratibu za utoaji leseni katika maeneo hayo kama zilivyoainishwa kwenye kanuni ya 17 (3) ya Kanuni za Madini, 2018 na kumwagiza Katibu Mkuu wa Wizara ya Madini, Profesa Simon Msanjila kuwasimamisha kazi pamoja na kuwachukulia hatua za kinidhamu watendaji wote waliohusika kwenye utoaji wa leseni hizo.

Pia, aliongeza kuwa katika uchenjuaji wa madini kumekuwepo na tabia ya wachimbaji wadogo wa madini kujenga mitambo ya kuchenjua dhahabu  bila kufuata taratibu ambapo hadi kufikia Februari, 2019 mitambo takribani 639 haina leseni, hivyo  kuisababishia Serikali kukosa jumla ya  shilingi bilioni 1.76, zitokanazo na ada ya maombi na ada ya mwaka ya mitambo hiyo.

Aliiagiza Tume ya Madini kuhakikisha kuwa mitambo yote ya uchenjuaji inapatiwa leseni ndani ya siku 30 na kusisitiza kuwa mitambo ambayo itakuwa haijapata leseni ndani ya muda ulioelekezwa haitaruhusiwa kuendelea kufanya kazi na wahusika wote watachukuliwa hatua kwa mujibu wa sheria.Aliwataka wenye mitambo husika kufika katika ofisi za mikoa na kuweka mambo sawa na kuongeza kuwa iwapi watakuta vikwazo vyovyote kwenye ofisi za mikoa wawapigie simu kama viongozi na vikwazo vyao kushughulikiwa mara moja.

Aliiagiza Tume ya Madini kwa kushirikiana na Wakuu wa Mikoa wote nchini kutenga eneo moja kwa kila mkoa na kusimamia ujenzi wa mitambo ya uchenjuaji madini lengo likiwa ni kuimarisha usimamizi na makusanyo ya mapato katika mitambo hiyo na kusisitiza kuwa zoezi likamilike ndani ya miezi mitatu.

Wakuu wa Idara na vitengo kutoka Wizara ya Madini pamoja na Tume ya Madini. Aliyesimama ni Mkuu wa Kitengo cha Ukaguzi wa Ndani cha Wizara ya Madini Mathius Abisai

Katika hatua nyingine, Waziri Biteko aliagiza Wizara kuwasimamisha kazi watendaji waliohusika katika utoaji wa leseni ndogo za uchimbaji wa madini kwa wageni jambo ambalo ni kinyume na kifungu cha 8(2) cha Sheria ya Madini ya Mwaka 2010 na Marekebisho yake ya Mwaka 2017 kinachokataza leseni ndogo ya uchimbaji wa madini kutolewa kwa wageni.

Mbali na Biteko kuitaka Tume ya Madini kufuta leseni za uchimbaji mdogo wa madini  zilizotolewa kwa wageni aliitaka Tume ya Madini kutokutoa leseni mpya kwa kampuni au mtu binafsi aliyepewa hati ya makossa na kushindwa kurekebisha marekebisho hayo kwa kuwa ni kinyume na Kifungu cha 31(b) cha Sheria ya Madini ya Mwaka 2010 na Marekebisho yake ya Mwaka 2017.

Aidha, aliwataka wachimbaji wadogo nchini kutafuta njia mbadala ya kuzuia mashimo yao kuanguka kwa kutumia zege na vyuma badala ya kutumia miti lengo likiwa ni kutunza mazingira kwa vizazi vijavyo na kusisitiza kuwa baada ya mwaka mmoja Serikali haitaruhusu tena magogo kutumika kwenye mashimo ya uchimbaji wa madini .

Awali akielezea mafanikio ya Wizara ya Madini, Biteko alisema kuwa katika bajeti ya   mwaka wa fedha wa 2018/2019, Wizara pamoja na mambo mengine iliahidi kuendeleza uimarishaji  wa uendeshaji  wa shughuli za uchimbaji na uendeshaji wa biashara katika sekta ya madini.

Alisema Wizara iliratibu mafunzo kwa ajili ya wachimbaji wadogo nchi nzima kwa kipindi cha mwezi Januari, 2019 ambapo yalifanyika kikanda katika vituo vya Singida, Chunya, Mpanda, Handeni, Buhemba, Kelwa na Bukombe ambapo yalilenga kuwapa wachimbaji wadogo taarifa sahihi za aina na kiasi cha mashapo ya madini yanayopatikana katika maeneo yao na aina ya teknolojia inayoweza kutumika katika uchenjuaji wa madini hayo.Alitaja mafanikio mengine kuwa ni pamoja na ujenzi wa vituo vya umahiri na vito vya mfano ambapo uligharimu shilingi bilioni 12 na kusisitiza kuwa vituo vinatarajiwa kuzinduliwa mwezi Machi, 2019 mara baada ya ujenzi wake kukamilika.

Mwandishi kutoka Kituo cha Televisheni cha Channel Ten, Kuringe Mongi akihoji jambo mara baada ya Waziri wa Madini, Doto Biteko kuzungumza na waandishi wa habari katika kikao hicho.

Aliongeza kuwa katika kipindi cha mwezi Januari, 2019 Wizara ilifanya uhakiki wa leseni zote za uchimbaji wa madini ambazo zimetolewa na kubaini leseni nyingi hazijafuata matakwa ya kisheria ambayo ni pamoja na  kuhodhi au kushindwa kuendeleza maeneo  ya utafiti waliyopewa kinyume na kifungu cha 36 (1) cha Sheria ya Madini ya Mwaka 2010 na Marekebisho yake ya Mwaka 2017 ambapo  imepelekea kukosesha wachimbaji wengine haswa wadogo maeneo ya kuchimba na kusababisha malalamiko kwa Serikali.

Alitaja matakwa mengine yaliyokiukwa kuwa ni pamoja na kushindwa kulipa malipo stahiki ya Serikali ikiwa ni pamoja na Ada ya Mwaka kinyume na kifungu cha 92 (1) cha Sheria ya Madini ya Mwaka 2010 na Marekebisho yake ya Mwaka 2017,ambapo kama fedha hizi kama zingepatikana zingeisaidia Serikali kutoa huduma kwa wananchi ikiwa ni pamoja na afya, elimu, maji na miundombinu.

Alisema uhakiki wa leseni za madini ulionesha kuwa, hadi kufikia Februari, 2019 jumla ya leseni 18,341 kati ya leseni 30,973 ambazo zipo hai zinadaiwa jumla ya shilingi bilioni 116.67 ambapo leseni kubwa za utafiti zinadaiwa shilingi bilioni 61.67, leseni za uchimbaji mkubwa zinadaiwa shilingi bilioni 6.41, leseni za uchimbaji wa kati zinadaiwa shilingi bilioni 28.28 na leseni za uchimbaji mdogo wa madini zinadaiwa shilingi bilioni 19.51.

Read more

Kampuni Ya Jervois Yaonesha Nia Kuwekeza Kabanga

Waziri wa Madini Doto Biteko amekutana na Wawakilishi wa Kampuni ya Jervois Mining Limited ya Australia ambayo imeonesha nia ya kuwekeza katika mradi wa Nikel- Colbat, Kabanga. 

Akizungumza katika kikao hicho, Waziri Biteko ameendelea kusisitiza kuhusu kufuatwa kwa Sheria na taratibu kwa wenye nia ya kuwekeza katika Sekta ya Madini na kueleza kuwa, kwa upande wa Wizara, inafanya jitihada za kuondoa urasimu kwenye uwekezaji katika sekta husika.

“ Tunataka mwekezaji mwenye nia anapoonesha dhamira ya kuwekeza baada ya taratibu zote kukamilika basi aanze mara moja,” amesema Waziri Biteko.

Akizungumza katika kikao hicho mmoja wa wawakilishi wa kampuni hiyo Balozi Mstaafu Andrew Mcalister, amesema kuwa, nchi ya Tanzania inaweza kuwa mzalishaji mkubwa wa madini ya Colbat kutokana na ubora wake na mazingira ya uwekezaji yaliyopo nchini ikiwemo uwazi.

Mbali na Waziri Biteko, wengine waliohudhuria kikao hicho ni Naibu Waziri wa Madini Stanslaus Nyongo, na wataalam wengine wa wizara.

Read more

Nyongo Ataka Watumishi Madini Kuepuka Rushwa

Na Asteria Muhozya, Dodoma

Naibu wa Waziri wa Madini Stanslaus Nyongo amewataka watumishi wa Wizara ya Madini kujiepusha na vitendo vya rushwa ikiwemo kuzuia rushwa katika sehemu zao za kazi kwani suala hilo linasababisha migogoro kwenye sekta ya madini.

Naibu Waziri Nyongo aliyasema hayo Februari 13 wakati akifungua mkutano wa Baraza la wafanyakazi la wizara na kuongeza kuwa, serikali inafuatilia mienendo ya watumishi wa sekta husika.

Alisema kuwa, wako watumishi wanaomiliki leseni kwa dhuluma suala ambalo pia limechangia kuwepo kwa migogoro mingi kwenye sekta na kueleza kuwa, Rais wa Jamhuri ya Muungano wa Tanzania Dkt. Magufuli anasisitiza suala la kuzingatia maadili katika utumishi wa umma na hususan katika sekta ya madini.

Katika hatua nyingine, Naibu Waziri Nyongo alilitaka Shirika la Madini la Taifa (STAMICO) kuhakikisha linajiendesha kwa faida na kusisitiza kuwa Serikali inataka gawio.

Baadhi ya Wajumbe wa Baraza la Wafanyakazi wakifuatilia mkutano huo.

Aidha, aliutaka uongozi wa STAMICO kuzingatia maslahi ya watumishi kwa kutoa motisha mbalimbali ikiwa ni pamoja na kuwapatia mafunzo lengo likiwa ni kuboresha utendaji kazi wa shirika kwa ujumla.

Akizungumzia mafanikio makubwa katika Sekta ya Madini, Naibu Waziri Nyongo alisema kuwa ni pamoja na mabadiliko ya Sheria ya Madini na kusisitiza kuwa kwa Afrika Tanzania imekuwa mfano kama nchi bora inayosimamia vyema rasilimali za madini.

“Sifa bora kwenye usimamizi wa Sekta ya Madini zisitufanye tubweteke bali tuendelee kufanya kazi kwa ubunifu wa hali ya juu huku tukizingatia maadili ya kazi,” alisema Nyongo

Nyongo aliendelea kusema kuwa, kama moja ya mikakati ya kutoa motisha kwa watumishi, uongozi wa Wizara unatakiwa kutoa fursa mbalimbali kwa watumishi ikiwa ni pamoja na mafunzo.

Wakati huo huo, akizungumza kwa niaba ya watumishi, Mwakilishi wa Chama cha Wafanyakazi wa Serikali na Afya (TUGHE) Tawi la Wizara ya Madini, Joyce Manyama alisema kuwa watumishi kupitia chama chao watafanya kazi bega kwa bega na uongozi wa Wizara ili kuhakikisha kuwa Sekta ya Madini inakuwa na viwanda vingi vya uongezaji thamani madini ili kufikia malengo ya Serikali kupitia mchango wa Sekta ya Madini kwenye ukuaji wa Pato la Taifa.

Mwakilishi wa Chama cha Wafanyakazi wa Serikali na Afya (TUGHE) Tawi la Wizara ya Madini, Joyce Manyama akizungumza jambo wakati wa kikao hicho.

Aidha, Manyama alichukua fursa hiyo kuishukuru Wizara ya Madini kwa kushirikiana na Shirika la Vyama vya Wachimbaji wa Madini Nchini (FEMATA), wachimbaji wadogo kwa kuitisha mkutano uliofanyika hivi karibuni baina yao na Rais wa Jamhuri ya Muungano wa Tanzania, Dkt. John Magufuli

Vilevile, aliishukuru Wizara kwa kuanzisha mfumo mpya wa utunzaji wa kumbukumbu za Wizara unaojulikana kama Electronic Filing Management System ambao utaboresha utunzaji wa kumbukumbu na kurahisisha upatikanaji wake pindi zinapohitajika.

Pia, aliiomba Wizara kuendelea kusimamia zoezi la upandishwaji wa vyeo ili watumishi waweze kupandishwa vyeo kulingana na sifa wanazokuwa nazo.

Naye Katibu Mkuu wa Wizara ya Madini, Profesa Simon Msanjila alisema kuwa Wizara itaendelea kuweka mazingira mazuri ya kazi ili kila mtumishi afanye kazi kwa ubunifu zaidi.

Aliongeza kuwa, kwa sasa Wizara inafanya vizuri ambapo Sekta ya Madini imekua kwa asilimia 18 huku mchango wa sekta kwa fedha za kigeni ikiwa ya tatu nyuma ya Kilimo na Utalii na kueleza kwamba, pamoja na mafanikio hayo, bado kuna rushwa na kukosekana uadilifu.

Read more

Biteko Ameitaka Bodi Ya STAMICO Kuhakikisha Inachangia Pato La Taifa Kabla Ya Mwezi Juni, 2019

Waziri wa Madini, Doto Biteko ameitaka Bodi ya Wakurugenzi wa Shirika la Madini la Taifa (Stamico) kuhakikisha kuwa sekta ya Madini kupitia shirika hilo inaongeza mchango wake kwa pato la taifa kwa kulipa mrabaha na kodi mbalimbali za serikali na kuongeza wigo wa ajira za watanzania kwa kuzingatia maslahi mapana ya nchi katika kuendesha shirika hilo.

Ameyasema hayo wakati wa ufunguzi wa Bodi ya Wakurugenzi wa Shirika hilo uliofanyika katika ukumbi wa ofisi za Stamico zilizopo maeneo ya Upanga jijini Dar es Salaam mnamo tarehe 12 February, 2019.

Biteko alisema anautambua wazi umuhimu wa Bodi hiyo katika kufanya maamuzi, kupitia Sheria na sera zinazohusiana na uendeshaji wa shirika hilo na ndio maana uundwaji wa bodi hiyo ulipewa kipaumbele mara tu baada ya yeye kuteuliwa kushika wadhifa huo wa Waziri wa Madini.

Ameendelea kwa kusema, uteuzi wao haukuwa rahisi na ulizingatia uwezo na uzoefu wa wajumbe katika kutekeleza majukumu ya Bodi pamoja na uzalendo walionao kwa taifa na kuwasihi kuhakikisha wanakuwa wasimamizi wazuri wa shirika hilo kwa manufaa ya Taifa.

Alisema, kigezo kikubwa kilichotumika katika uteuzi huonikuangalia ubunifu wa mtu mmoja mmoja, mahali anakofanyia kazi au alipofanyia kazi,“ninyi katika ofisi mlizopita mliachamambo makubwa Imani yetu wizara ni kuwa mtatumia ubunifu huo katika kusimamia na kubadilisha taswira ya shirika letu”. Alisisitiza.

Alikiri kuwa Serikali imewaamini na kuwapa mamlaka ya kusimamia Shirika hilo tunaamini mnaweza ndio maana katika wengi mliteuliwa  ninyi.

Akibainisha majukumu ya Bodi hiyo, Biteko alisema ni pamoja na Kuisimamia Menejimenti ya Shirika katika utekelezaji wa majukumu yake ya kila siku kwa mujibu wa Sheria.

Kusimamia sera ya Shirika na kuanzisha mifumo ya udhibiti katika utekelezaji wa Sera hizo, Kupitia na kuidhinisha miundo ya Maendeleo ya Watumishi wa Shirika, kupitia na kuidhinisha mishahara na marupurupu ya watumishi wa shirika pamoja na kuanzisha mfumo mzuri wa kutoa gawio kwa wana hisa wa Shirika.

Aidha, Biteko alilipongeza shirika kwa hatua nzuri waliyoifikia katika kutekeleza baadhi ya miradi ikiwa ni pamoja na uchimbwaji na uuzwaji wa makaa ya mawe wa Kabulo, kuanza uchenjuaji wa mabaki ya mchanga wa dhahabu katika eneo la mradi wa dhahabu wa Buhemba, kuzalisha na kuuza kokoto Ubena Zomozi, kuimarisha usimamizi wa miradi ya ubia ya TanzaniteOne na Buckreef na kampuni tanzu ya STAMIGOLD, na kuratibu shughuli za kuwaendeleza wachimbaji wadogo.Biteko alikiri kuwa Serikali imechoshwa na kupata hasara kupitia katika shirika hilo, na kusema badala ya miradi inayoanzishwa katika shirika hilo kuzalisha faida inazalisha madeni na kuliingizia Taifa hasara ya mabilioni ya pesa.

Waziri wa Madini, Doto Biteko (Kulia) akimkabidhi Mwenyekiti wa Bodi ya Wakurugenzi wa Stamico Mej. Gen (Mstaafu) ichael Isamuyo nyenzo ikiwa ni mwongozo katika kutekeleza majukumu ya bodi kwa shirika hilo.

Akitoa mfano wa watu wawili waliokwenda vitani, mmoja akiwa na moyo wa vita bila silaha na mwingine akiwa na silaha bila moyo wa kupigana Biteko alisema ni dhahiri yule mwenye moyo wa vita atashinda na kuitaka bodi hiyo kuiga mfano huo katika kutekeleza majukumu yake.

Aliendelea kusisitiza kuwa Serikali anaamini wajumbe wa bodi hiyo wanao moyo wa kupigana vita bila kubeba silaha na kuwasihi kuanzia hapohapokutekeleza majukumu yake,“anzeni hivyo mlivyo, ipeni Serikali sababu ya kuishawishi serikali kuleta pesa”. Alisisitiza.

Serikali ya awamu ya tano inafanya vitu vilivyoshindikana, Vilee vitu ambavyo watu wanasema haviwezekani ndivyo vinavyofanyika nasi tunaamini mmeteuliwa ili kurekebisha madhaifu ya Stamico yaliyoshindikana kwa muda mrefu, wakurekebisha na kulifanya shirika la Stamico kuwa bora ni ninyi bodi pamoja na  menejimenti ya shirika.

Aidha, ameitaka bodi hiyo kumtafuta popote pale mtu yeyote wanayedhani anaweza kulisaidia Shirika kuzalisha faida na vile vile amewataka kumpeleka mtu yeyote mwenye cheo chochote anayelirudisha shirika hilo nyuma ili atafutiwe kazi nyingine ya kufanya.“Haiwezekani shirika kutoka kuundwa kwake mwaka 1972 halijawahi kutoa gawio, haiwezekani lipo kwa ajili ya nini? Lakini watu wakizunguka wanalipwa posho lakini mwenye mali hapati kitu”. Biteko aling’aka.

Aidha, Biteko aliwataka wanabodi hao kubadilisha wimbo wa lawama unaosbabaishwa na shirika hilo na kuimba wimbo wa sifa, amekiri kutaka matokeo na sio stori. Alisema kwa namna anavyowafahamu wajumbe hao wa bodi wakishindwa kulibadilisha shirika hilo kwa awamu hii yeye binafsi atakuwa wa kwanza kuomba shirika hilo lifutwe.

Aliwataka wajumbe hao wa bodi kuifanya Stamico kuwa eneo la mataifa mengine kujifunzia namna bora ya kuendesha mashirika ya umma ikiwa ni pamoja na kuwaacha kufanya maamuzi yao kama shirika.

Alimuhakikishia Mwenyekiti wa bodi hiyo kuifanyia kazi changamoto ya uhaba wa wafanyakazi unaolikabili shirika mara tu baada ya kuurekebisha muundo wa uongozi wa shirika hilo aliokiri kuwa na vyeo vingi kulioko uwezo na uzalishaji wa shirika.

Aliitaka bodi hiyo kuhakikisha inabadilisha fikra na taswira ya shirika kwa kubadilisha namna ya kufikiri kwa watendaji wake ili wafikiri kibiashara zaidi na si kimishahara.

Naibu Waziri wa Madini, Stanslaus Nyongo akizungumza jambo kwa Bodi ya Wakurugenzi ya Stamico na Menejimenti ya Shirika hilo wakati wa hafla ya uzinduzi wa bodi hiyo jijini Dar es Salaam

Alisisitiza kuwa anataka aibu ya Stamico ya miaka mingi iondolewe sasa na kama sio sasa basi sasa hivi, na kuwataka kutoa taarifa wakati wowote wanapoona wanakwama katika kutekeleza majukumu yao.

Aidha, Biteko aliitaka bodi hiyo kwenda kufuatilia suala la hisa za kampuni ya Tanzania Gemstone Industries Ltd (TGI) iliyosajiliwa mnamo mwaka 1969 ikiwa ni kampuni Tanzu ya Stamico na kutoliingizia faida yeyote shirika licha ya uzalishaji kufanyika na kuwa na umiliki wa hisa za kampuni ya Mundarara Mining Ltd kwa asilimia 50.

Alihitimisha kwa kusisitiza kuwa wizara haitaingilia masuala ya shirika lakini jicho lake litakuwa Stamico kutokana na kwamba kushindwa kwa shirika ni kushindwa kwa wizara na kushindwa kwa wizara ni kushindwa kwa Waziri kitu ambacho hatakikubali.

Kwa upande wake Mwenyekiti wa Bodi hiyo, Mej. Gen (Mstaafu) Michael Isamuyoalitoa shukrani zake kwauteuzi uliofanywa wa kumpatia fursa ya kuwa Mwenyekiti wa bodi hiyo ambapo alieleza kuwa aliyeteuliwa mwezi Disemba Tarehe 6 na baadaye kuteuliwa kwa wajumbe wengine wa bodi ambao amekiri watafanya kazi kubwa kwa shirika na taifa.

Alikiri kuwa wajumbe wa bodi wametoka katika maeneo mbalimbali wakiwa na ujuzi na uzoefu tofauti tofauti ambao wakikaa pamoja katika kutekeleza majukumu watafanya kitu kikubwa na kusababisha mabadiliko makubwa kwenye Shirika kubwa la Taifa la madini.

Amekiri kuwa masuala yote waliyoagizwa watatekeleza kama walivyoelekezwa “Majukumu yetu tunayafahamu lakini haya majukumu ni muongozo tu, naamini tutatumia uwezo wetu, tutatumia akili zetu, uzoefu tulionao katika maeneo mbalimbali kuhakikisha kuwa tunatekeleza majukumu yetu kwa ufanisi kuhakikisha kwamba zile changamoto ambazo zipo na zitakazoendelea kujitokeza tunazigeuza kuwa fursa na tunazitatua”. Alisisitiza.

Katibu Mkuu wa Wizara ya Madini, Prof. Simon Msanjila akizungumza jambo kwa Bodi ya Wakurugenzi ya Stamico na Menejimenti ya Shirika hilo wakati wa hafla ya uzinduzi wa bodi hiyo jijini Dar es Salaam.

Amesema katika ameneo yote changamoto hazikosekani, lakini kufanya kazi kwa mazoea ndiko kunakorudisha nyuma mafanikio “huu mfumo wa kufanya kazi kwa mazoea bila ubunifu wowote utaturudisha nyuma alisema na haya ndiyo masuala uliyotushauri” amekiri kuwa bodi yake ina utashi huo na watahakikisha kuwa wanakuwa na ubunifu wa hali ya juu na kuifanya Stamico kujikwamua kutoka mahali walipo.

Akijibu hoja ya kuwa na moyo wa vita kabla ya kupata silaha, Isamuyo alisema yapo matatizo mengi kwa shirika ikiwa ni pamoja na suala la uhaba wa mitaji pamoja na wafanyakazi, na kuiri kuwa kutokana na moyo wa vita walionano changamoto hizo zitageuzwa na kuwa fursa.

Akitolea mfano ujenzi wa nyumba zenye vioo zilivyowafanya wezi kuichukulia ujenzi huwa kama fursa kwa kuwarahisishia kuingia  ndani ndani ya nyumba bila shida lakini pia hiyo kuwa ni fursa kwa wajenzi na wafanyabiashara kuzalisha kuzalisha nondo na kujengea ili kuwapa wezi kazi ya kufanya pindi wanapotaka kuvamia majengo ya watu kwa lengo la kuwaibia. Isamuyo ameahidi kugeuza changamoto za Stamico kuwa fursa na kulipeleka shirika mbele.

Amemuhakikishia Waziri wa Madini kuwa bodi hiyo haitashindwa kazi, “Hatutashindwa kwa sababu hamkushindwa kututeua, mlikuwa na majina mengi yenye sifa zinazofanana na zetu lakini hamkushindwa kututeua na kwa sababu ninyi hamkushindwa kututeua na sisi hatutashindwa kuhakikisha kwamba tunasonga mbele katika kutekeleza majukumu ya shirika” alisisitiza .

Amekiri kwamba kabla ya kuomba silaha ya mizinga sehemu yeyote tutahakikisha kwamba silaha ndogo zitafanya kazi na kuhakikisha adui anapigwa, amesema watumishi waliopo lazima wahakikishe kuwa wanafanya kazi na kuliletea shirika faida bila kutegemea mtu kutoka eneo lingine. Alisema waajiliwa wengine wakipatikana waje kuongeza nguvu lakini si kwa sababu waliopo wameshindwa kazi.

Waziri wa Madini, Doto Biteko (katikati kulia) na Mwenyekiti wa Bodi ya Wakurugenzi ya Stamico katikati (kushoto) wakiwa katika picha ya pamoja na wajumbe wa bodi hiyo, menejimenti ya shirika pamoja na viongozi waandamizi wa Wizara ya Madini mara baada ya uzinduzi wa bodi hiyo.

Kuhusu Mikataba isiyokuwa na tija, Isamuyo amewataka wanasheria kuhakikisha mikataba inayoingiwa sasa hivi inazalisha faida tofauti na ilivyokuwa awali.

Kuhusu agizo la kuhakikisha shirika linatoa gawio kwa serikali, Isamuyo amesema agizo hilo limetolewa kwa mwanajeshi, hilo ni agizo na litatekelezwa vizuri sana na kuahidi kufuatilia suala la kushughulikia hisa za kampuni ya Tanzania Gemstone Industries Ltd(TGI) ambayo ni kampni tanzu ya Stamico itashughulikiwa ipasavyo.

Ameiomba serikali kushughulikia changamoto za msingina masuala mengine yanayopaswa kutatuliwa na wizara kufanyiwa maamuzi mapema ikiwa ni pamoja na suala la ajira mpya na kukiri kuwa shirika ni la kibiashara hivyo kila dakika inayopotea inazalisha hasara kwa shirika.

Uzinduzi wa Bodi hiyo ulishirikisha viongozi wote waandamizi wa wizara ikiwa ni pamoja na Naibu Waziri wa Madini, Stanslaus Nyongo aliyewataka Bodi hiyo kwenda kufanya kazi na kuithibitisha Imani ya serikali kwao, Katibu Mkuu wa Wizara, Prof. Simon Msanjila pamoja na Mkurugenzi wa Utawala na Rasilimali Watu, Issa Nchasi.

Read more