Archives for News & Events

Uzinduzi wa Maabara ya Kisasa ya Utambuzi wa Uasili wa Madini 08/06/2018

Mawaziri, Naibu Mawaziri kutoka wizara ya Madini, Nishati na Elimu wakiwa katika Kituo cha Madini na Jiosayansi cha Afrika, wakimsubiri Waziri Mkuu Kasim Majaliwa ambaye hii Leo anazindua maabara ya kisasa ya utambuzi wa uasili wa Madini.

Waziri wa Madini Mhe. Angellah Kairuki (MB) pamoja na Naibu Waziri wa Madini, Mhe. Stanslaus H. Nyongo (MB) wakiwa na Mawaziri, Naibu Mawaziri kutoka Wizara ya Madini, Nishati na Elimu katika uzindua maabara ya kisasa ya utambuzi wa uasili wa Madin tarehe 08/06/2018 Jijini Dar Es Salaam.

 

Read more

Kampuni ya Auxin ya China yaonesha nia kujenga Kiwanda cha Baruti

Waziri wa Madini Mhe. Angellah Kairuki (MB) tarehe 07/06/2017 amekutana na Wawakilishi wa Kampuni ya Auxin ya China ambayo imeonesha nia ya Kujenga Kiwanda cha Baruti nchini.

Wataalam wa Madini wakimsiliza Mhe. Waziri wa Madini alipokutana na Wawekezaji kutoka China.

Ujumbe wa kampuni hiyo umemweleza Waziri Kairuki kuwa lengo la kukutana naye ni kutaka kujua taratibu za uwekezaji katika eneo hilo zikiwemo za Kisheria .

Waziri wa Madini Angellah Kairuki akiangalia mfano wa vifaa vinavyotengenezwa na Kampuni ya Auxin ya nchini China.

Akizungumza katika kikao hicho, Waziri Kairuki amewaeleza wawakilishi hao kuwa endapo kampuni hiyo itapata fursa ya kuwekeza, suala la ajira kwa watanzania linatakiwa kuchukuliwa kwa umuhimu.

Pia, amewataka wawakilishi hao kusoma kipengele cha uwezeshaji wa wazawa ili kufahamu namna ambavyo kampuni husika itahakikisha watanzania wanaozunguka maeneo ya uwekezji wananufaika.

Imeandaliwa
Asteria Muhozya
Madini

Read more

Wataalamu wa Madini Nchini Wajifunza Uzoefu kutoka Australia

Wataalam mbalimbali kutoka sekta ya madini nchini wameshiriki warsha maalum iliyotolewa na wataalamu kutoka Australia, kwa lengo la kujifunza uzoefu kutoka nchi hiyo ambayo imepiga hatua kubwa katika sekta husika.
Naibu Waziri wa Madini Doto Biteko alifungua rasmi warsha hiyo ya siku mbili, Juni 4 jijini Dodoma na kusema kuwa Tanzania inahitaji kujifunza zaidi kutoka nchi zilizofanikiwa katika sekta ya madini kama Australia, ili iweze kukuza zaidi mchango wake katika katika Pato la Taifa.

Naibu Waziri wa Madini Doto Biteko (kushoto), akijadiliana jambo na Mtaalamu wa Madini kutoka Australia, Rick Rogerson, muda mfupi baada ya Naibu Waziri kufungua rasmi warsha ya wataalam wa madini nchini, iliyotolewa na wataalam kutoka Australia; Juni 4 na 5 mwaka huu, jijini Dodoma.

“Wenzetu Australia, sekta yao ya madini ina mchango mkubwa sana; zaidi ya asilimia 40 kwenye Pato lao la Taifa. Kwa hiyo, tunakutana nao kubadilishana uzoefu, ni namna gani wao wamefanya kuwezesha sekta husika kuchangia kwa kiasi hicho kwenye Pato la Taifa.”
Aidha, Naibu Waziri alisema kuwa, suala muhimu ambalo Wizara ya Madini inalisimamia ni kuhusu usimamizi wa rasilimali za madini.
Alisema kuwa, lengo jingine la warsha hiyo ni kujifunza Australia imefanya nini katika kusimamia na kutatua migogoro kwenye sekta ya madini, ili Tanzania itumie mbinu hizo kutatua migogoro iliyopo kwenye sekta husika.

Katibu Mtendaji wa Tume ya Madini Tanzania, Prof Shukrani Manya (kulia), akisalimiana na wataalamu wa madini kutoka Australia, Danielle Risbey na Rick Rogerson, muda mfupi kabla ya kuanza kwa warsha ya wataalam wa madini nchini, iliyotolewa na wataalam kutoka Australia; Juni 4 na 5 mwaka huu, jijini Dodoma.

Biteko alitumia fursa hiyo kuiomba serikali ya Australia kuangalia uwezekano wa kuendesha warsha husika kwa wachimbaji wadogo nchini ili wapate maarifa ya namna bora ya usimamizi wa rasilimali za madini.
Akizungumzia mchango wa sekta ya madini kwenye uchumi wa viwanda, Biteko alieleza kuwa, rasilimali za madini ni tegemeo kubwa katika kukuza uchumi huo.

“Ndiyo maana mtaona kwamba tunayo miradi mikubwa ya makaa ya mawe, ambayo inazalisha nishati ya umeme utakaotumika kwenye viwanda vyetu. Kwa hiyo lazima tuisimamie vizuri,” alifafanua.
Aidha, aliongeza kwamba, Tanzania ina madini mengi ya teknolojia yakiwemo ya Neobium yanayohitajika sana duniani kwa ajili ya viwanda.
Alitaja madini mengine muhimu kwa viwanda kuwa ni Graphite pamoja na Marble, ambayo yote yanapatikana kwa wingi Tanzania.

Mtaalamu wa Madini kutoka Australia, Rick Rogerson, akiwasilisha mada katika warsha ya wataalam wa madini nchini (hawapo pichani), iliyofanyika Juni 4 na 5 mwaka huu, jijini Dodoma.

Kwa upande wake, Kamishna wa Madini Tanzania, Mhandisi David Mulabwa, alisema kuwa, warsha hiyo ni muhimu sana katika kuwaongezea watumishi ujuzi na maarifa kwa ajili ya kukabiliana na changamoto za kisekta.

Wataalamu mbalimbali wa sekta ya madini nchini, wakifuatilia mada mbalimbali zilizokuwa zikiwasilishwa na wataalamu wa madini kutoka Australia, katika warsha iliyofanyika Juni 4 na 5 mwaka huu jijini Dodoma.

“Kuna mambo ya mazingira, tozo na kodi mbalimbali katika sekta. Kwa hiyo, jinsi watumishi wanavyokuwa na ujuzi na maarifa, tunaamini watakuwa katika nafasi nzuri ya kufanya ya kufanya maamuzi ambayo yatasaidia kuhakikisha kwamba rasilimali za nchi hii zinalinufaisha Taifa ipasavyo.”
Awali, mmoja wa waratibu wa warsha hiyo, ambaye ni Afisa kutoka Ubalozi wa Australia kutoka Ofisi ya Nairobi, Deanna Simpson, alieleza kuwa; Serikali ya nchi yake imekuwa ikitoa warsha za aina hiyo katika nchi mbalimbali za Afrika, zikiwemo Kenya, Madagascar, Ethiopia na Sudan.
Aidha, aliongeza kuwa, Australia Magharibi ina kampuni zaidi ya 100 zinazoendesha miradi mbalimbali ya madini zaidi ya 350 katika nchi za Afrika takribani 30 ikiwemo Tanzania.
Warsha hiyo ya madini imehitimishwa Juni 5, mwaka huu.

Imeandaliwa:
Veronica Simba
Afisa Habari
Dodoma

Read more

Waziri Kairuki afunga Maonesho ya Madini

Waziri wa Madini Angellah Kairuki amefunga rasmi Maonesho ya Madini yaliyofanyika katika Viwanja vya Bunge jijini, Dodoma kuanzia tarehe 30 Mei hadi tarehe 1 Juni, 2018.

Akifunga maonesho hayo, Waziri Kairuki aliwashukuru washiriki wote wa maonesho hayo ambayo yalizishirikisha Taasisi mbalimbali za Serikali, Shirikisho la Wachimbaji Wakubwa (TME) na kampuni zinazojishughulisha na uchimbaji na uongezaji thamani madini na kueleza kuwa, yametoa elimu kubwa kuhusu Sekta ya madini kwa Wabunge waliyotembelea.

“Yamekuwa ni maonesho ya kipekee na yametoa elimu kubwa kwa wabunge walioyatembelea,”aliongeza Kairuki.

Aliwataka washiriki hao kuendelea kushirikiana na Serikali katika utekelezaji wa majukumu yao ya kisekta na kuongeza kuwa, yuko tayari kuwapokea wadau wote kwa ajili ya ushauri na majadiliano lengo likiwa ni kuboresha Sekta ya madini.

Waziri wa Madini Angellah Kairuki akitoa Cheti kwa mmoja wa Washiriki wa Maonesho ya Madini. Wanaofuatilia ni kushoto ni Naibu Waziri wa Madini Doto Biteko, wa pili kulia ni Naibu Waziri wa Madini, Stanslaus Nyongo na wa kwanza kulia ni Katibu Mkuu wa Madini, Prof. Simon Msanjila na wa Kwanza Kuli ni Mtaalam kutoka Wizara ya Madini, Assah Mwakilembe.

Kwa upande wake, Naibu Waziri Stanslaus Nyongo alisema kushiriki kwao katika maonesho hayo ni ishara ya ushirikiano na kuongeza kuwa, maonesho hayo yamekuwa kivutio kikubwa tofauti na maonesho mengine ambayo yamekuwa yakifanyika katika Viwanja hivyo vya Bunge.

Aliwataka washiriki kujipanga kwa maonesho mengine kama hayo na kueleza kuwa, awamu nyingine utawekwa utaratibu wa kumpata mshindi kama mwoneshaji bora wa maonesho hayo.

Maonesho hayo yalifunguliwa rasmi tarehe 31 Juni, 2018 na Spika wa Bunge la Jamhuri ya Muungano wa Tanzania, Job Ndugai, na kufungwa tarehe 1 Juni, 2018 na Waziri wa Madini, Angellah kairuki.

Read more

Waziri Kairuki azindua Tume ya Madini

Waziri wa Madini Angellah Kairuki amezindua Tume ya Madini sambamba na kukabidhi vitendea Kazi kwa Mwenyekiti wake Prof. Idris Kikula pamoja na Makamishna wa Tume hiyo.

Akizungumza wakati wa uzinduzi huo, Waziri Kairuki alisisitiza kuwa, ni imani yake, imani ya Rais wa Jamhuri ya Muungano wa Tanzania Dkt. John Pombe Magufuli na Watanzania wote kuwa Tume hiyo itabadilisha simulizi za Sekta ya madini kutoka kuwa za kukatisha tamaa na kuwa za matumaini na hivyo kuibadili historia ya sekta ya madini kutoka kuwa ya miguno na manung’uniko na kuwa ya kujipongeza na kujivunia.

” Nataka mtambue kuwa ninyi sasa ndiyo macho, masikio, pua na mikono yetu kwenye sekta ya madini,” alisisitiza Waziri Kairuki.

Aliongeza kuwa,Watanzania wana matarajio makubwa na Tume hiyo na kueleza kuwa, wanataka kulala usingizi wakiamini kuwa sekta ya madini iko katika mikono safi na salama kwa kuwa wanaamini Tume itatenda haki, itasimamia ukweli na kuzingatia maslahi ya kesho, kesho kutwa na vizazi vijavyo.

Waziri wa Madini Angellah Kairuki katika picha ya Pamoja na Mawaziri na Naibu Mawaziri kutoka Wizara mbalimbali walishiriki uzinduzi wa Tume.

Aidha, Waziri Kairuki alitumia fursa hiyo kuishauri Tume ya Madini kuyafanyia kazi masuala kadhaa ambayo yatakuwa na tija kwa sekta ya Madini na kuyataja kuwa ni pamoja na kukamilisha kwa wakati zoezi la kupitia maombi ya leseni huku akisisitiza zoezi hilo kuendana na upekuzi wa kina juu ya waombaji wa leseni ya haki miliki ya madini ili kujiridhisha na kuhakikisha kwamba wanaopatiwa leseni ni wale tu wenye sifa, vigezo na uwezo wa kuwekeza.

” Zoezi hili lihakikishe kwamba kila anayefanya biashara ya madini ana leseni na leseni hai iliyolipiwa,” alisisitiza Kairuki.

Pia, aliishauri Tume kuhakikisha inawadhibiti watu au makampuni ambayo yanashikilia leseni walizopewa kwa muda mrefu bila kuziendeleza kinyume na masharti waliyopewa wakati

Ushauri mwingine nikuhakikisha kwamba mrefu awadhibiti watu au makapuni ambayo yanashikilia leseni walizopewa kwa muda mrefu bila kuziendeleza kinyume na msharti waliyopewa wakati wa kuidhinishiwa leseni

Vilevile, alishauri muhimu wa kuwepo uataratibu wa kufanya ukaguzi wa mara kwa mara kuona maendeleo ya uwekezaji katika migodi ambayo imepatiwa leseni.

“Kwa kufanya hivyo mtaweza kujiridhisha kwamba mlichoahidiwa na mwekezaji ndicho kinachofanyika na pia mtaweza kushughulikia changamoto mapema,” alisisitiza Kairuki,

Waziri wa Madini Angellah Kairuki kushoto akimkabidhi Vitendea kazi Mwenyekiti wa Tume ya Madini Prof. Idrisa Kikula.

Pamoja na hayo alishauri kuhusu uwezekano wa kuweka utaratibu wa kutoa bei elekezi za madini aina mbalimbali iwe madini ya ujenzi, madini ya viwandani na mengine na kuongeza kuwa, utaratibu huo utasaidia sana wachimbaji wadogo na wa kati.” Zoezi hili liende na kuhakikisha kwamba tunasimamia vyema uwasilishaji wa taarifa za mienendo ya biashara ya madini na uzalishaji,” aliongeza Kairuki; Ushauri mwingine ulitolewa kuwa, Tume iangalie uwezekano wa kuanzisha rejista za uzalishaji unaofanyika na pia kuwa na rekodi za maafisa madini wanaokagua uzalishaji na uthamini wa madini.

Akizungumzia upande wa vibali alishauri mauzo ya madini nje ya nchi ni vyema yakafanyika kwa mapitio ama vibali ili kuhakikisha panakuwepo maelezo na taarifa za kina za madini yanayosafirishwa kuhusu yalikotoka.

“Vilevile kwa kushirikiana na vyombo vyetu vya ulinzi na usalama tuangalie mbinu za kisasa za kudhibiti utoroshaji wa madini ili kudhibiti biashara haramu ya madini,” alisema Waziri Kairuki.

Halikadhalika, alizungumzia kuhusu Serikali kupata mapato stahiki ambapo alishauri kufanyika ukaguzi na uhakiki wa kiasi na ubora wa madini yanayozalishwa na migodi mikubwa, ya kati, na midogo na kuhakikisha wachimbaji wadogo ambao wanafanya uchimbaji bila kutambulika wafanyiwe utaratibu ili warasimishwe.

Mwisho alisisitiza kuhusu Tume kuwachukua watumishi watakaoonekana kufaa wa uliokuwa Wakala wa Ukaguzi wa Madini Tanzania (TMAA) kwa kuwa majukumu ya Tume hiyo yanahitaji weledi, uzalendo na uaminifu wa hali ya juu.

Kwa upande wake, Mwenyekiti wa Tume ya Madini Profesa Idrisa Kikula aliwataka watumishi wa Tume kuwa waadilifu na kuonesha weledi kwenye utendaji wao ili kulinda heshima iliyopewa Tume.

Aliongeza kuwa, Tume imepokea kwa dhati maelekezo yote na maangalizo yote muhimu ambayo yameshauriwa kufanyiwa kazi ili sekta ya madini ilete tija iyokuwa kusudiwa.

Pia, aliongeza kuwa, tayari Tume imepokea taarifa nyingi hasa za migogoro ambayo kiuhalisia inatakiwa kupata ufumbuzi na kuongeza kuwa, Tume itatengeneza kanzidata ya migogoro.

Kwa upande wake, Mwenyekiti wa Kamati ya Kudumu ya Bunge ya Nishati na Madini Dustan Kitandula alisema kuwa, watanzania wana matumaini makubwa na sekta ya madini baada ya kuundwa Tume na kuamini kuwa, itawaondoka kwenye umaskini.

Uzunduzi wa Tume ulifanyika tarehe 30 Mei, 2018 jijini Dodoma. Kwa mujibu wa maelezo ya Waziri Kairuki, Tume inaundwa na Ofisi za madini zilizoko Mikoani, ofisi zitakazokuwa migodini, Maabara na Makao Makuu ya Tume.

Read more

Spika Ndugai afungua maonesho ya madini Bungeni Dodoma

Spika wa Bunge la Jamhuri ya Muungano wa Tanzania, Job Ndugai, leo Mei 30, amefungua rasmi maonesho ya madini katika viwanja vya Bunge, jijini Dodoma na kuipongeza Wizara ya Madini kwa kuyaandaa.
Akitoa hotuba ya ufunguzi, Ndugai alimpongeza Waziri mwenye dhamana, Angellah Kairuki pamoja na watendaji wa Wizara, kwa juhudi kubwa za kutangaza na kulinda rasilimali ya madini hapa nchini. Alisisitiza kuwa, anatumaini juhudi hizo zitaendelezwa ili kuiwezesha sekta husika kuwa na mchango mkubwa katika uchumi wa Taifa letu.

Alisema kwamba Wizara ya Madini inalo jukumu kubwa la kuufahamisha umma kuhusu sekta husika kupitia njia mbalimbali kama vile vyombo vya habari na maonesho mbalimbali.

Spika wa Bunge la Jamhuri ya Muungano wa Tanzania, Job Ndugai (katikati), akiangalia aina mbalimbali za madini yanayopatikana nchini, alipotembelea Banda la Chuo cha Madini (MRI) wakati wa ufunguzi wa maonesho ya madini kwenye viwanja vya Bunge jijini Dodoma, Mei 31 mwaka huu.

“Maonesho haya yamekuja wakati muafaka kwa sababu kipindi hiki nchi yetu iko katika mageuzi makubwa katika sekta ya madini; na ninyi wizara mnawajibika kuifanikisha azma hii kwa njia mbalimbali, hususan vyombo vya habari na maonesho kama haya.”

Aidha, Spika aliwataka wadau mbalimbali wa madini kuhakikisha wanazingatia sheria, kanuni na taratibu zilizopo, ikiwa ni pamoja na usalama wa wafanyakazi wao na kulipa kodi za Serikali.

Kuhusu suala la uongezaji thamani madini kabla ya kuyauza, Ndugai alisema kwamba hilo ni suala muhimu sana kwa kuzingatia sera ya nchi ya kuwezesha uchumi wa viwanda. “Ni kwa kufanya hivyo tu ndipo tutajenga viwanda ambavyo vitatoa fursa ya ajira kwa watanzania na kuinua uchumi wa nchi yetu,” alisisitiza.

Akizungumzia mchango wa Bunge katika kukuza sekta ya madini, alisema Bunge limekuwa makini katika kuhakikisha uwekezaji kwenye sekta husika unakuwa wenye tija na manufaa kwa pande zote; yaani Serikali, Taifa na wawekezaji.
“Tuliunda Kamati mbalimbali za ufuatiliaji wa sekta ya madini. Nafurahi kuwaambia kwamba mambo yamekuwa yakiboreka siku hadi siku. Nawasihi tuendelee hivyohivyo kwa manufaa ya pande zote.”

Mjasiriamali anayejishughulisha na uongezaji thamani madini kwa kutengeneza na kuuza bidhaa mbalimbali za urembo, Susie Kennedy (mwenye blauzi nyeupe), akimwonesha Spika wa Bunge la Jamhuri ya Muungano wa Tanzania, Job Ndugai, moja ya bidhaa anazotengeneza kutokana na madini; wakati wa ufunguzi wa maonesho ya madini kwenye viwanja vya Bunge jijini Dodoma, Mei 31 mwaka huu. Kushoto ni Waziri wa Madini, Angellah Kairuki.

Awali, akimkaribisha Spika kufungua maonesho husika; Waziri Kairuki alisema kuwa, Wizara imeandaa maonesho hayo kwa kuzingatia kuwa ni Wizara mpya hivyo inahitaji kutoa elimu kwa umma kuhusu majukumu yake; yakijumuisha dhima na dira.

“Baada ya Bunge lako tukufu kuifanyia marekebisho Sheria ya Madini Namba 14 ya Mwaka 2010, kupitia marekebisho ya Sheria Namba 7 ya Mwaka 2017, Wizara yangu imekuwa na jukumu kubwa la kutekeleza maelekezo ya Sheria hiyo.”

Maonesho hayo ya siku tatu, yaliyoanza Mei 30 na kutarajiwa kuhitimishwa Juni Mosi; yameshirikisha Taasisi mbalimbali za Serikali, Shirikisho la Wachimbaji Wakubwa (TCME) na Kampuni zinazojishughulisha na uchimbaji na uongezaji thamani madini.

Read more

Naibu Waziri Biteko-Ukuta wa Mirerani utaweka rekodi Afrika

Naibu Waziri wa Madini Doto Biteko amesema Ujenzi wa Ukuta kuzunguka Migodi ya  Mirerani ni jambo la Kihistoria na kwamba linatarajiwa kuweka rekodi Barani Afrika.

Naibu Waziri Biteko aliyasema hayo tarehe 23 Machi, wakati wa kikao cha Maandalizi ya Uzinduzi wa Ukuta huo unaotarajiwa kuzinduliwa mapema mwezi Aprili na Rais wa Jamhuri ya Muungano wa Tanzania Dkt. John  Magufuli.

Mkurugenzi wa Utawala na Rasilimaliwatu Issa Nchasi, (wa pili kulia) wakibadilishana jambo na baadhi ya wajumbe wa Kamati ya Maandalizi ya uzinduzi wa Ukuta wa Mirerani.

Aliongeza kuwa, ukuta huo ni jambo ambalo watanzania wamelisubiri kwa miaka mingi licha ya kuwepo kwa mapendekezo na sasa hatua zimechukuliwa na kutekelezwa.

Pia alilipongeza Jeshi kwa nidhamu kubwa ambayo limeonesha kwa ujenzi wa ukuta huo  wenye urefu wa kilomita 25.4  na ambao ujenzi wake umechukua kipindi cha miezi 3 tofauti na ilivyopangwa.

Kwa upande wake Mkuu wa Mkoa wa Manyara, Alexander Mnyeti, alilipongeza Jeshi kwa kazi ambayo imefanyika na kuwataka Wajumbe wa Kamati kukamilisha utekelezaji wa majukumu yote kwa wakati.

Kikao hicho kilihudhuriwa na Mkuu wa Mkoa wa Manyara Alexander Mnyeti, Naibu Waziri wa Madini Doto Biteko, Mkuu wa Wilaya ya Simanjiro Zephania Chaula, Kamati ya Ulinzi na Usalama ya Mkoa wa Manyara na Wilaya ya Simanjiro, Wizara ya Madini,  Wizara ya Ulinzi na Jeshi la Kujenga Taifa, Jeshi la Ulinzi la Wananchi wa Tanzania (JWTZ ) Jeshi la Kujenga Taifa (JKT) , Shirika la Umeme Tanzania (TANESCO – Manyara) na Wakala wa Barabara ( TANROAD)

Imeandaliwa na:
Asteria Muhozya, Mirerani
Afisa Habari,
Wizara ya Madini,
5 Barabara ya Samora Machel,
S.L.P 2000,
11474 Dar es Salaam,
Simu: +255-22-2121606/7, Nukushi: +255-22-2121606,
Barua Pepe: info@madini.go.tz,                                                                               
Tovuti: madini.go.tz

Read more

Naibu Waziri Biteko akutana na wachimbaji madini Lugoba

Naibu Waziri wa Madini, Doto Biteko leo tarehe 06 Mei, 2018 amekutana na wachimbaji wa madini ya ujenzi aina ya kokoto katika eneo la Lugoba wilayani Bagamoyo mkoani Pwani. Mkutano huo uliohusisha Mkuu wa Wilaya ya Bagamoyo, Mbunge wa Chalinze, Ridhiwani Kikwete na wananchi, ulilenga kujadili changamoto katika uchimbaji madini ya ujenzi aina ya kokoto.

Mbunge wa Chalinze, Ridhiwani Kikwete (CCM) akielezea shughuli za uchimbaji wa madini ya kokoto kwa Naibu Waziri wa Madini, Doto Biteko na wananchi wa wilaya ya Bagamoyo (hawapo pichani) katika mkutano uliofanyika katika eneo la Lugoba wilayani Bagamoyo mkoani Pwani.

Katika mkutano huo, Naibu Waziri Biteko alitoa maelekezo mbalimbali ikiwa ni pamoja na wawekezaji  kuendeleza maeneo yao,  wawekezaji kutouza leseni kwa mtu mwingine pasipo kushirikisha serikali,    wawekezaji kuandaa mpango wa utoaji huduma kwa jamii pamoja na kuutekeleza na  Ofisi ya Madini ya Kanda ya Mashariki kufuatilia ahadi za wawekezaji katika huduma za jamii na kuwasilisha  ripoti mara moja.

Maelekezo mengine ni pamoja na Ofisi ya Madini Kanda ya Mashariki kuwasilisha  ripoti ya athari za mazingira kabla ya Mei 20, 2018, wawekezaji kushirikiana na wananchi wanaowazunguka, kampuni zenye mgogoro na wananchi kuhakikisha zinamaliza tofauti zao na fedha za halmashauri  kutumika kwenye uwekezaji mwingine kwa ajili ya maendeleo.

Imeandaliwa na:
Asteria Muhozya, Mirerani
Afisa Habari,
Wizara ya Madini,
5 Barabara ya Samora Machel,
S.L.P 2000,
11474 Dar es Salaam,
Simu: +255-22-2121606/7, Nukushi: +255-22-2121606,
Barua Pepe: info@madini.go.tz,                                                                               
Tovuti: madini.go.tz

Read more